ಹೆಸರಿಲ್ಲದ ಭಾವಗಳು...

ಸುರಗಿ ಮರದ ನೆರಳಲ್ಲಿ ಕುಳಿತು,
ಕೆಳಗೆ ಬಿದ್ದ ಹೂವುಗಳನ್ನು ಹೆಕ್ಕಿ
ಒಂದೊಂದಾಗಿ ಮಡಿಲೊಳು ತುಂಬುವಾಗ,
ಕಳೆದುಹೋದ ಸವಿ ನೆನಪುಗಳನ್ನೇ
ಕಂಪನ್ನಾಗಿಸಿ, ಉಸಿರೊಳಗೆಳೆದು, ಮತ್ತೆ
ಮನದೊಳಗೆ ಒಂದೊಂದಾಗಿ ತುಂಬಿಕೊಳ್ಳುವ,
ಹುಚ್ಚು ಹಂಬಲ

**

ತೂಗುಯ್ಯಾಲೆಯಲಿ ಕೂತು,
ಜೋರಾಗಿ ಜೀಕುತ್ತಾ ಕಣ್ಮುಚ್ಚಿದರೆ,
ಒಮ್ಮೆ ನಾನು ಭೂತದಲ್ಲಿರುವೆ,
ಮಗದೂಮ್ಮೆ ಭವಿಷ್ಯತ್ತಿನಲ್ಲಿ...
ಕಣ್ಬಿಟ್ಟರೆ ಸಾಕು, ಕಾಣುವುದು
ವರ್ತಮಾನದಲ್ಲಿ ನಿಂತಿರುವ,
ನನ್ನ ಜೋಕಾಲಿ.

**

ಅತ್ತ ಸಾಗರದ ಮೊರೆತ,
ಇತ್ತ ನದಿಯ ಜುಳು ಜುಳು...
ನಡುವಿರುವ ಬಿಸಿ ಡಾಮರಿನಲ್ಲಿ
ನಾ ಸಾಗುವಾಗ,
ನಿನ್ನ ನೆನಪಾಗಿ ಮುಗುಳ್ನಗಲು,
ಥಟ್ಟನೆ ಹೊಳೆಯಿತು, ನಾನಿರುವುದೀಗ
ಮರವಂತೆಯಲ್ಲಿ