ಸೋಮವಾರ, ಅಕ್ಟೋಬರ್ 8, 2012

ಅನುರೂಪ

ಕೊಡಲೇನು ನಿನಗೆ ಉಡುಗೊರೆಯ?
ಎಣಿಸ ಹೊರಟರೆ ಸಾಕು ಎಲ್ಲವೂ ಪೂರ್ಣ.... ಶೂನ್ಯ!

ಕಣ್ಗಳ ಹನಿ ಮುತ್ತುಗಳನೇ ಪೋಣಿಸಿ ಕೊಡ ಹೊರಟರೆ,
ನಿನ್ನ ತೋರ್ಬೆರಳುಗಳು ಅಣೆಕಟ್ಟು ಕಟ್ಟಿ,
ಚಿಮ್ಮಿಬಿಟ್ಟವು ನನ್ನ ಕಣ್ಮುಂದೇ..

ಹೂನಗುವನರಳಿಸಿ ನಿನ್ನಡಿಗಳಿಗಿಡ ಹೊರಟರೆ,
ಅದಾಗಲೇ ನಗೆ ಮೊಗ್ಗೊಂದು ನಿನ್ನ ತುಟಿಯಂಚಲರಳಿ,
ನನ್ನೆದೆಯೊಳಿದ್ದ ನಿನ್ನ ಚಿತ್ರವನ್ನೇರಿ ಬೀಗತೊಡಗಿತು..

ನಿನ್ನ ನನಸಾಗದ ಕನಸುಗಳ ಕನವರಿಕೆಯಾಲಿಸಲು,
ತಲೆದಿಂಬಿಗೆ ನಾ ಕಿವಿಯಾಗಿ ಕುಳಿತು, ಕಾದ ಶಬರಿಯಾದರೆ,
ನಿನ್ನೊಂದೊಂದು ಕನಸೊಳಗೂ ನನ್ನಾಶಯಗಳನೇ ಕಂಡು ಬುಗುರಿ ಹಣ್ಣಾದೆ.

ನಿನ್ನ ತಡವಿದಲೆಲ್ಲಾ ನನ್ನ ಮೈಯ ರೋಮಗಳು, ರಂಧ್ರಗಳು.
ನನ್ನ ಉಚ್ಛ್ವಾಸದೊಳಗಿನ ಬಿಸಿಯುಸಿರ ತಂಪಾಗಿಸೂ ನಿನ್ನ ನಿಶ್ವಾಸ.....
ಒಳಗಿನ ಜೀವ ಸಂಚಲನದೊಳಗೆಲ್ಲಾ ನಿನ್ನದೇ ಪ್ರತಿಫಲನ
ನಾ-ನೀ ಅರ್ಧನಾರೀಶ್ವರ!

-ತೇಜಸ್ವಿನಿ ಹೆಗಡೆ