ರಾಗ ಮಾಂತ್ರಿಕ

ಏಕೋ ಏನೋ ಬಯಸಿದೆ ಈ ಮನ
ನಿನ್ನಿಂದ ಬಹು ದೂರ ಸಾಗಿ,
ನಾ ಕಾಣದ ಆ ತೀರವ ಸೇರಿ,
ಬದುಕಬೇಕಿದೆ ಒಂದು ದಿನವ....

ಹರಿವ ನೀರಾಗಿ, ಜುಳು ಜುಳು ನಾದವಾಗಿ
ಉಕ್ಕಿ ಹರಿದು ರಭಸದಿ ಸಾಗ ಹೊರಟೆ ನಾನು
‘ಶುದ್ಧ ಸಾರಂಗಿ ರಾಗವ’ ಹಾಡಿ, ನನ್ನನೇ ಹೀರಿ,
ಸೆಳೆದುಕೊಂಡೆಯಲ್ಲಾ ನೀನು!

ಕರಿ ಮೋಡವಾಗಿ, ಬಾನ ತುಂಬಾ ತೇಲಿ
ಗಾಳಿವೇಗದಲ್ಲಿ ಹಾರಿ, ಸಾಗ ಹೊರಟೆ ನಾನು
‘ಮಲ್ಹಾರ ರಾಗವ’ ಹಾಡಿ, ಮಳೆಬಾಣಗಳ ಸುರಿಸಿ,
ಕುಡಿದುಬಿಟ್ಟೆಯಲ್ಲಾ ನೀನು!

ಮಲ್ಲೆ ಮೊಗ್ಗೊಳು ಹೊಕ್ಕು, ಅದರ ಕಂಪೊಳಗವಿತು,
ಬೇರ ತುದಿಯನು ಸೇರಿ, ಇಳಿಯ ಬಯಸಿದೆ ನಾನು
‘ಬಸಂತ್ ರಾಗವ’ ಹಾಡಿ, ಮೊಗ್ಗ ಹೂವಾಗಿಸಿ,
ಕಂಪಬೀರಿದೆಯಲ್ಲಾ ನೀನು!

ಎಕೋ ಏನೋ ಬಯಸಿದೆ ಈ ಮನ
ನಿನ್ನಿಂದ ಬಹು ದೂರ ಸಾಗಿ,
ಆ ತೀರವ ಸೇರಿ, ನನಗಾಗಿ...
ಬದುಕಬೇಕಿದೆ ಒಂದು ದಿನವ.