ಕವನ

ಆ ದಿನಗಳು

-----------

ಹಾರೋ ಹಕ್ಕಿಯೇ ಅಂಗೈಯಲ್ಲಿ,
ಕುಣಿಯೋ ನವಿಲುಗಳೇ ಮನದಂಗಳದಲ್ಲಿ,
ಎಲ್ಲೆಲ್ಲೂ ವಸಂತನ ಹಾಡು, ಕುಣಿತ..
ಕಾಡುವ ಕನಸುಗಳಿಗೆಲ್ಲಾ
ನಿನ್ನದೇ ಮುಖಾರವಿಂದ

ಹರಿವ ಲಹರಿಗಳೆಲ್ಲ ಸೇರಿ
ಸೋನೆ ಮಳೆಯಾಗಿ ಸೋರಿ
ಮನದ ಧಗೆಯನೆಲ್ಲ ಹೀರಿ
ಎದೆಯೊಳಗಿಳಿದಾದಿನಗಳು..

ಯಾವುದೋ ಹಳೆಯ ಹಾಡು ಮತ್ತೆ
ಹೊಸ ಹಾಡಾಗಿ ಗುನುಗಲು,
ಮೊಗದ ತುಂಬೆಲ್ಲಾ ರಾಗರಂಜಿನಿ..
ಕದ್ದು ಕೊಟ್ಟ ಮುತ್ತುಗಳ ಸವಿ
ಮೆದ್ದು ಹೊದ್ದ ರೆಪ್ಪೆಗಳಡಿಯಲ್ಲಿ
ಸವಿಗನಸ ಬಿತ್ತಿದಾದಿನಗಳು

ಬರಲಾರವೇ ಮತ್ತೆ ತಿರುಗಿ
ಆ ನೆನಪುಗಳೇ ಚಿಗುರಿ, ಹಸಿರಾಗಿ
ನವ ವಸಂತದ ಗಾಳಿ ಬೀಸಿ
ಶಿಶಿರ ತುಂಬಿಹ ಬಾಳಲಿ
ನಗುವಾಗಿಸೋ ಆ ಸುದಿನಗಳು