ಹುಚ್ಚು ಮನಸಿನ ಹಲವು ಭಾವಗಳು...

**ನನ್ನ-ನಿನ್ನ ನಡುವೆ**

ಒಲುಮೆಯ ಸಾಗರವಿದೆ
ನೋವ-ನಲಿವ ಅಲೆಗಳಿವೆ
ಮುತ್ತುಗಳ ರಾಶಿಯಿದೆ
ಆದರೂ ಅದೇಕೋ
ಒಡಲಾಳದೊಳು
ಸುನಾಮಿಯೂ ಇದೆ!
----------------------------
**ವಿಶ್ವಾಸ**

ನಳ್ಳಿಯಿಂದ ಬಿಂದಿಗೆಗೆ
ಹನಿ ಹನಿಯಾಗಿ ನೀರ ತುಂಬಿದ ನೀರೆ
ತನ್ನ ಕಟಿಯಲ್ಲಿಟ್ಟು
ನಾಜೂಕಾಗಿ ನಡೆವಾಗ..
ಕಲ್ಲೆಡವಿ ಬಿದ್ದು
ಬಿಂದಿಗೆಯ ನೀರೆಲ್ಲಾ ಸೋರಿ
ಮಣ್ಣುಪಾಲು!
----------------------------
**ಪ್ರೀತಿ**

ದೇವಿಗಾಗಿ ಗರ್ಭಗುಡಿಯ
ಬಾಗಿಲ ಬಳಿ ಕಾದು
ಸುಸ್ತಾದ ಭಕ್ತ, ಕೊನೆಗೆ
ನಂದಾದೀಪದ ಬೆಳಕಿಗೆ
ಕೈ ಮುಗಿದು ಹೊರಟ
--------------------------
**ಕಾಲ**

ಪುಟ್ಟ ಮಗುವಿನ
ಕಪಿಮುಷ್ಠಿಯೊಳಡಗಿ ಭದ್ರವಾಗಿದ್ದ
ಮಂಜುಗಡ್ಡೆಯೊಂದು
ಕರಗಿ ಹನಿಯಾಗಿ
ನೀರಾಗಿ ಹರಿಯಿತು.

ಕವನ

ಆ ದಿನಗಳು

-----------

ಹಾರೋ ಹಕ್ಕಿಯೇ ಅಂಗೈಯಲ್ಲಿ,
ಕುಣಿಯೋ ನವಿಲುಗಳೇ ಮನದಂಗಳದಲ್ಲಿ,
ಎಲ್ಲೆಲ್ಲೂ ವಸಂತನ ಹಾಡು, ಕುಣಿತ..
ಕಾಡುವ ಕನಸುಗಳಿಗೆಲ್ಲಾ
ನಿನ್ನದೇ ಮುಖಾರವಿಂದ

ಹರಿವ ಲಹರಿಗಳೆಲ್ಲ ಸೇರಿ
ಸೋನೆ ಮಳೆಯಾಗಿ ಸೋರಿ
ಮನದ ಧಗೆಯನೆಲ್ಲ ಹೀರಿ
ಎದೆಯೊಳಗಿಳಿದಾದಿನಗಳು..

ಯಾವುದೋ ಹಳೆಯ ಹಾಡು ಮತ್ತೆ
ಹೊಸ ಹಾಡಾಗಿ ಗುನುಗಲು,
ಮೊಗದ ತುಂಬೆಲ್ಲಾ ರಾಗರಂಜಿನಿ..
ಕದ್ದು ಕೊಟ್ಟ ಮುತ್ತುಗಳ ಸವಿ
ಮೆದ್ದು ಹೊದ್ದ ರೆಪ್ಪೆಗಳಡಿಯಲ್ಲಿ
ಸವಿಗನಸ ಬಿತ್ತಿದಾದಿನಗಳು

ಬರಲಾರವೇ ಮತ್ತೆ ತಿರುಗಿ
ಆ ನೆನಪುಗಳೇ ಚಿಗುರಿ, ಹಸಿರಾಗಿ
ನವ ವಸಂತದ ಗಾಳಿ ಬೀಸಿ
ಶಿಶಿರ ತುಂಬಿಹ ಬಾಳಲಿ
ನಗುವಾಗಿಸೋ ಆ ಸುದಿನಗಳು