ಕೊಳೆಯದಿರಲಿ..ನನ್ನೆದೆಯ ಫಸಲು...

ಗಾಢ ನೀಲ ಬಣ್ಣವನು ತುಂಬಿ
ಕರಿಮೋಡದ ಭಾರ ಹೊತ್ತ,
ಅಯೋಮಯ ಭಾವವೊಂದು
ಆವರಿಸುತಿದೆ ನನ್ನೊಳಗೆ

ಎಲ್ಲಿಂದ ಬಂತೋ ನಾ ಕಾಣೆ
ಇಲ್ಲೇ ಮನೆ ಮಾಡಿಕೊಂಡು
ಈಗಲೋ ಆಗಲೋ,
ಸುರಿಯುವಂತಿದೆ...
ನನ್ನೆದೆಯ ಫಸಲನ್ನೇ
ಕೊಳೆಸುವಂತಿದೆ...

ಬಯಸಿದ್ದೆ ತಿಳಿ ನೀಲಿ ಬಣ್ಣವ
ಹೋಗಲಿ ಬೇಡ, ಸಿಗಬಾರದೇ
ಬಿಳಿ ಬಣ್ಣವಾದರೂ?

ಬಿಳಿಯೊಳಗೆ ಬೇಕಾದ ರಂಗು ತುಂಬಿ,
ಸಪ್ತವರ್ಣವನ್ನೇ ಕಾಣಿಸುತ್ತಿದ್ದೆ
ಫಸಲಿಂದ ಹೊಸ ಬೀಜವ ಹೆಕ್ಕಿ
ಹೊಸ ಪೈರ ಬೆಳೆಯುತ್ತಿದ್ದೆ.

ಬೇಡವೆಂದರೂ ಬಂದಿದೆ
ಗಾಢ ನೀಲಿಯ ವೇಷ ಧರಿಸಿ,
ಮಳೆಮೋಡದ ಮುಸುಕು ಹಾಕಿ

ಬರಲಿ ಬಿಡಿ, ಈಗಿಲ್ಲ ಚಿಂತೆ...
ಹಾಕಿರುವೆ ಬಿಳಿಯ ಟರ್ಪಾಲು
ನನ್ನೆದೆಯ ಫಸಲ ಮೇಲೆ
ಬಿದ್ದರೆ ಹೇಳಿ ಈಗ
ಹನಿ ನೀರು!!