ಸ್ವಗತ

ಯಾರು ಸಾಟಿ ಎನಗೆ?!

ಹೊರಗಿನ ಬೆಳಕಿನೊಡನೆ
ಒಳಗಿನ ಬೆಳಕಿನಾಟ
ಒಳಗೆ ಹೊರಗೆಲ್ಲಾ
ಬೆಡಗು-ಬೆಳಕಿನ ಚೆಲ್ಲಾಟ
ಜೊತೆಗೆ ಸೇರಿದೆ ನನ್ನ ತುಂಟಾಟ.

ತುಂಬಿ ಹೊರ ಚೆಲ್ಲಲ್ಲು
ಅಣಿಯಾಗಿ ನಿಂತಿಹ
ನನ್ನ ನಗೆ ಬುಗ್ಗೆಗಳು,
ಒಳಗಿಂದ ಹೊರಬರಲು
ಹೊರ ಬೆಳಕೇ ಮಬ್ಬು-ಮಂಕು,
ಒಳಗೆಲ್ಲಾ ತಂಪು-ಸೊಂಪು.

ಬಿಳಿ ಮೋಡಗಳೊಳಗಿಂದ
ಕರಿ ಚಂದ್ರರು ಇಣುಕುತಿಹರೋ,
ಕಪ್ಪು ಗೋಲಿಗಳೊಳಗಿಂದ
ಚುಕ್ಕಿ ತಾರೆಗಳು ಮಿನುಗುತಿಹವೋ!!
ರವಿಯೇ ಕಣ್ಣ ಬಿಂಬವಾಗಿ
ಎಳೆಯ ಕಿರಣ ಬೀರುತಿಹನೋ!!

ನನ್ನೊಳಗೆ ಆತ್ಮತೇಜ,
ನಿನ್ನೊಳಗೆ ಕ್ಷಣದ ಬೆಳಕು
ನನ್ನ ಜೊತೆ ಪೈಪೋಟಿಯೇ?!
ನಿನ್ನ ಬದುಕು ನನ್ನ ಕೈಲಿ
ನೀನು ಎನಗೆ ಸಾಟಿಯೇ?!

ಒಂದೇ ಕ್ಷಣ ಸಾಕು ನನಗೆ,
ನಿನ್ನ ಕೆಡವಿ ಹಾಕಲು,
ನೂಕಿ ನಿನ್ನ ಒಡೆಯಲು,
ಮೆಟ್ಟಿ ಕುಣಿದಾಡಲು,
ಬಿಡೆನು ನಿನ್ನ ಬೆಳಗಲು.

- ಅದಿತಿ ತೇಜಸ್ವಿನಿ ಹೆಗಡೆ :)
(ಫೋಟೋ ಮೇಲೆ ಕ್ಲಿಕ್ಕಿಸಿದರೆ ಚಿತ್ರ ದೊಡ್ಡದಾಗಿ ಕಾಣುವುದು)