ಇರುವುದೆಲ್ಲವ ಬಿಟ್ಟು...

ಅದೇಕೋ ಎಂತೋ!?
ಬಾನ ಚಂದಿರನೇ ನೊಸಲ ಬಿಂದಿಯಾಗಿದ್ದರೂ,
ನೀಲಾಕಾಶದ ತುಂಬೆಲ್ಲಾ ಚೆಲ್ಲಿ,
ಅಣಕಿಸುವಂತಿರುವ ತಾರೆಗಳಿಗಾಗಿ
ಕೈಚಾಚುತಿರುವೆ ನಾನು!

ಅದೇಕೋ ಎಂತೋ!?
ಋತುಗಳ ರಾಜ ವಸಂತನೇ ತಾನಾಗಿ
ನನ್ನರಸಿ ಬಳಿಬಂದರೂ,
ಶಿಶಿರನಾಸರೆಗಾಗಿ ಕಾಯುತ್ತಾ
ಬಳಲಿ ಬಾಡುತಿರುವೆ ನಾನು!

ಅದೇಕೋ ಎಂತೋ?!
ಸುತ್ತಲೂ ಸಿಹಿನೀರಗೊಳಗಳೇ
ತುಂಬಿ ತುಳುಕಾಡುತಿದ್ದರೂ,
ಶರಧಿಯೊಳಗೇ ಮುಳುಗೇಳಿ,
ದಾಹ ತಣಿಸ ಬಯಸುವೆ ನಾನು!!

(ಬಹುಕಾಲದ ಹಿಂದೆ ಎಲ್ಲೋ ಗೀಚಿ ಮರೆತುಬಿಟ್ಟಿದ್ದ ತುಣುಕೊಂದು ಸಿಗಲು, ಅವು ಇದ್ದಹಾಗೇ ಮಾನಸದಲ್ಲಿ ಮೂಡಿಸುತ್ತಿದ್ದೇನೆ.)